Романија со предлог до Бугарија: Нова воена команда на НАТО во Црното Море

Романија ѝ предложила на Бугарија двете држави заеднички да испратат писмо до раководството на НАТО со барање за создавање воена команда во Црното Море. Ова го соопшти романскиот министер за национална одбрана Раду Мируша, пренесе БГНЕС.

Тој го разгледал прашањето телефонски со својот бугарски колега по последните инциденти во Црноморскиот регион. Предлогот предвидува со командата на ротациски принцип да раководат сојузничките црноморски држави, при што би се менувало и местото каде што е распоредена, соопшти романската национална информативна агенција.

Романија е подготвена да го преземе раководењето со новата структура и да ја распореди на својот црноморски брег од 2028 година. Дотогаш Букурешт ја прифаќа можноста командата да дејствува на турскиот црноморски брег со учество на романски и бугарски офицери, посочува Мируша.

Според романскиот министер, инцидентите со беспилотни летала, потонатите пловни објекти и морските мини налагаат координирани дејства. Тој нагласува дека ризиците за воздушната и поморската безбедност во регионот повеќе не можат да се разгледуваат како изолирани национални проблеми. Мируша ги поврзува зголемените ризици и со руските напади врз украинската инфраструктура, кои, според него, создаваат дополнителни закани за безбедноста на Романија и Бугарија.

Веќе има договорена соработка меѓу Бугарија и Романија

Во јули 2024 година Романија и Бугарија потпишаа меморандум за создавање Регионална команда на компонентата за специјални операции во Црноморскиот регион (HQ R-SOCC). Според романското Министерство за национална одбрана, структурата е наменета да ги координира сојузничките напори во областа на специјалните операции и да придонесува за зајакнување на одбраната на источното крило на НАТО.

Предлогот на Мируша од 14 октомври се однесува на одделна иницијатива за воена команда на црноморските држави од Алијансата.