Румен Радев: Приемот на Бугарија во Европскиот механизам за стабилност носи сигурност што ѝ е потребна на секоја економија

„Време е Бугарија да го заземе местото што ѝ припаѓа во ЕМС и во рамките на Европа – како држава што не само што обезбедува отпорност во финансиската сфера и стабилен развој на економијата, туку и како конструктивна и активна земја што создава решенија од стратешко значење за иднината на Европската Унија“, изјави премиерот на Бугарија, Румен Радев.

Приемот на Бугарија како дваесет и прва членка на Европскиот механизам за стабилност (ЕМС) носи сигурност што ѝ е потребна на секоја економија. Ова го изјави Радев, кој во Софија ја отвори конференцијата на високо ниво „Заедно градиме отпорност: Членството на Бугарија во Европскиот механизам за стабилност (ЕМС)“. На настанот учествуваат вицепремиерот Г’лаб Донев и извршниот директор на ЕМС, Пјер Грамења. Премиерот посочи дека целосната интеграција на Бугарија во Економската и монетарната унија е решавачки чекор за економскиот развој на земјата и признание не само за квалитетот на бугарските институции и за отпорноста на економијата, туку во голема мера и за истрајноста на Бугарите.

„Членството на Бугарија во механизмот е пред сè одговорност, бидејќи секоја држава треба да вложува напори за одржување одржливи и стабилни финансии. Одговорност што подразбира разбирање дека еден систем може да биде стабилен само ако постојано се развива и се усовршува, ако создава ресурси што ќе ги вложува во својата иднина. Токму разбирањето на оваа одговорност е дел од темелните принципи на програмата за управување на нашата влада“, изјави Румен Радев. Премиерот нагласи дека бугарската влада вложува напори за надминување на предизвиците со дефицитот и враќање кон одржлив финансиски систем, за предвидливост на даночниот систем и на регулативите, за зајакнување на владеењето на правото и за усовршување на нормативната рамка, со цел да се искористат предностите што ги нуди членството во еврозоната во поглед на привлекувањето инвестиции.

Владата вложува напори да го трансформира и самиот модел на економски развој на земјата – од модел заснован врз потрошувачка и прераспределба кон модел на квалитативно нов економски развој со висок економски раст, кој се темели на повисока продуктивност, конкурентност, воведување високи технологии, привлекување инвестиции во клучните индустрии и поттикнување на извозот, истакна премиерот.

Во своето обраќање Румен Радев ги издвои силните страни на Бугарија, со кои земјата уште еднаш докажува дека е подготвена да ги искористи можностите на ЕМС и финансиските механизми на ЕУ. Меѓу нив е стратешката географска положба, која придонесува за глобалната и меѓуконтиненталната поврзаност.

„Имаме исклучително важна улога во развојот на овој процес на унапредување на поврзаноста. Не случајно претседателката на Европската комисија, Урсула фон дер Лајен, во својот извештај изречно ја спомена Бугарија поради нашата водечка улога токму во подобрувањето на поврзаноста. И тоа е приоритетна задача за Бугарија“, нагласи премиерот. Тој истакна и дека Бугарија значително придонесува за безбедноста во регионот, инвестирајќи во одбранбените способности и во заштитата на надворешните граници на Европската Унија.

„Веруваме дека конкурентноста ќе се развива преку механизми достапни за сите земји членки, за да имаме праведна распределба на огромните ресурси што ќе се акумулираат во Фондот за конкурентност, а ќе сметаме и на помошта од Европскиот механизам за стабилност“, изјави премиерот. Тој го нагласи и значењето на тоа што земјата во изминатите години ги зачувала екстрактивната и преработувачката индустрија, како и тешката индустрија, и дека ќе продолжи да инвестира во нив и да ги развива.

„Сега, кога доаѓа времето за изградба на индустриите на иднината, за новите технологии, за центрите за податоци, за фабриките за вештачка интелигенција, Бугарија е подготвена“, изјави Румен Радев, нагласувајќи дека земјата има силен екосистем во областа на информатичките технологии и висококвалификувани кадри што работат во него.

„Го нудиме најважното – добри услови и брзо приклучување кон електродистрибутивната мрежа. Ќе сметаме и на поддршката од Европскиот механизам за стабилност за што поскоро да ги искористиме сите овие наши предности, за Бугарија да може да го заземе местото што ѝ припаѓа како држава што не само што обезбедува отпорност во финансиската сфера и стабилен развој на економијата, туку и како конструктивна и активна земја што создава решенија од стратешко значење за иднината на Европската Унија.“