Сè уште активни жаришта од пожарот во Национален парк „Рила“
И покрај дождот кој падна во текот на ноќта, сè уште има тлеечки жаришта во внатрешноста и по периметарот на пожарот во Националниот парк „Рила“. Според екипите кои од утрово вршат обиколки, засегнатата површина е над 100 хектари.
На терен работат околу 60 лица – пожарникари, вработени во шумските стопанства, раководството на паркот и војници од Третата бригадна команда – Благоевград.
Главниот инспектор Јулијан Петров од противпожарната служба во Благоевград за БНР изјави дека дождот не успеал целосно да го изгаси огнот, а во дел од зоните воопшто и не заврнало.
Засега не е планирано во гаснењето да се вклучи воен хеликоптер, но доколку ситуацијата се влоши, ќе биде обезбедена и таква техника. Најризичен и понатаму останува североисточниот фронт, каде што теренот е карпест и речиси непристапен.
