Во Фрајбургскиот универзитет расте интересот за бугарскиот јазик и култура

Студентите по славистика на Универзитетот во Фрајбург сè повеќе покажуваат интерес за изучување на бугарски јазик, литература и култура. Од минатата година бугарскиот јазик може да се избере и како прва специјалност – исто како и другите словенски јазици, јавува Радио Бугарија.

Ова го изјави во програмата „Христо Ботев“ на Бугарското национално радио проф. Живка Колева-Златева, професорка на Великотирновскиот универзитет и лекторка по бугарски јазик и култура во Фрајбург, еден од најстарите универзитети во Германија. Таа потсети дека бугаристиката таму се развива од 2006 година.

Првата лекторка, проф. д-р Румјана Конева, во Славистичкиот семинар ги донела ракописите од белешките на предавањата „Светот на Словените“ на проф. Иван Шишманов, кои тој ги одржувал во Германија во 1923–1924 година. Лекциите, напишани на германски јазик, биле работени од научници од Славистичкиот семинар и објавени во Германија во 2023 година, а потоа преведени и издадени во Бугарија во 2024 година.

Проф. Иван Шишманов се смета за основоположник на славистиката во Фрајбург, а во зградата на универзитетот е поставена и спомен-плоча во негова чест.

Под водство на проф. Ахим Рабус, Славистичкиот семинар на Фрајбургскиот универзитет денес е водечки центар за дигитална палеославистика. Од проф. Рабус и негови колеги се создадени електронски ресурси за обработка на старобугарски текстови, што дополнително го зголемува интересот кон бугаристиката, нагласува проф. Колева-Златева.