Со огромен успех заврши првата меѓународна мисија на „Сакам бебе“ и Фондација „Бугарска Памет“ во Албанија

Изминатиот викенд, водечки бугарски специјалисти предводени од д-р Георги Николов спроведоа бесплатни прегледи и консултации за семејства со репродуктивни потешкотии во градот Корча, Албанија. Како што стои во соопштението, иницијативата била целосно финансирана од д-р Милен Врабевски.

Интересот бил исклучително голем, а сите термини биле пополнети уште пред почетокот на мисијата, што, според Фондацијата, јасно покажува колку е потребна ваквата медицинска поддршка во регионот.

Ова претставува трета здравствена иницијатива на Фондација „Бугарска Памет“ во областа во последните два месеци. Фондацијата истакнува дека активностите се дел од долгорочните напори за обезбедување пристап до специјализирана медицинска грижа за локалното население, меѓу кое има и многу лица со бугарски корени.

Во соопштението дополнително се нагласува дека токму од Корча во последните два месеци пристигнале одлични вести: Две семејства успешно очекуваат деца благодарение на поддршката од бугарските специјалисти и финансиската помош на д-р Врабевски.

Фондацијата заклучува дека секое дете кое се раѓа по долго очекување е жив доказ дека грижата и солидарноста немаат граници.