Софискиот универзитет ќе ја одбележи 90-годишнината на истакнатиот бугарски историчар академик Васил Ѓузелев

Во Софискиот универзитет „Св. Климент Охридски“ ќе биде одбележана 90-годишнината на истакнатиот бугарски историчар академик Васил Ѓузелев, соопшти прес-центарот на високообразовната установа, пренесува БТА.

На 19 октомври во 11:00 часот, во Историскиот факултет, ќе биде отворена биографската изложба „Историчар станав по вокација“, посветена на јубилејот на академик Ѓузелев. Од 11:30 часот во Ректоратот ќе се одржи средба на историчарот со студенти и професори од Софискиот универзитет.

Академик Ѓузелев е меѓународно признат научник со значаен придонес во развојот на историската наука и проучувањето на историските извори. Својот творечки пат го посветил на Софискиот универзитет и на неговиот Историски факултет.

Долги години бил раководител на Катедрата „Историја на Бугарија“ и на Катедрата „Средновековна општа историја“ при Историскиот факултет. Раководел и со секцијата за средновековна историја во Институтот за историја при Бугарската академија на науките, како и во Институтот за балканистика.

Автор е на повеќе од 70 книги, над 300 студии и статии и повеќе од 200 научнопопуларни трудови и интервјуа, објавени во Бугарија и во странство.

Академик Васил Ѓузелев е добитник на престижни меѓународни награди во областа на хуманистичките науки, како и на Почесниот знак со сина лента и Почесниот знак со ѓердан на Софискиот универзитет „Св. Климент Охридски“.