Средба Петрова-О’Флаерти: Акцент врз правата на Бугарите во странство и случаите на дискриминација, нетолеранција и говорoт на омраза
Шефицата на бугарската дипломатија Велислава Петрова се сретна со комесарот за човекови права на Советот на Европа, Мајкл О’Флаерти, кој се наоѓа во посета на Бугарија.
Акцент на средбата беше заштитата на правата на бугарските граѓани во странство како еден од водечките надворешнополитички приоритети на Бугарија. Особено внимание беше посветено на случаите на дискриминација, нетолеранција и говорoт на омраза. Шефицата на бугарската дипломатија ја истакна потребата на европско ниво да се разговара за спротивставување на овие појави, со цел да бидат гарантирани основните права на граѓаните во согласност со Европската конвенција за човекови права.
„Бугарија останува доследно ангажирана со принципите на демократијата, човековите права и владеењето на правото“, изјави министерката Петрова. Таа го нагласи и значењето што земјата го придава на долгогодишната соработка со Советот на Европа. Додаде дека за сегашната влада од суштинско значење е примената на добри практики од државите членки на организацијата за зголемување на животниот стандард на бугарските граѓани.
Фокус на посетата на комесарот за човекови права на Советот на Европа, Мајкл О’Флаерти, е состојбата на старите лица во домовите за резиденцијална грижа, при што слични посети се организирани во Франција и Романија. Министерката Велислава Петрова ја истакна заложбата на владата за значително подобрување на системот за грижа за старите лица, вклучително и преку модернизација на домовите за стари лица.
