Студија: Богатството на Бугарите достигна 1 трилион лева
За прв пат, кон крајот на 2024 година, богатството на Бугарите достигна историска вредност од 1 трилион лева – пет пати повеќе од брутниот домашен производ, јавува БНР. Просечно, според истражувањето на Експертниот клуб за економија и политика, на секое домаќинство му припаѓаат околу 350.000 лева.
70% од сè што Бугарите поседуваат се станови. Само малку над еден процент се останатите форми на инвестиции. Затоа, толкувањето на бројките изгледа поинаку, вели Макс Баклајан:
„Од една страна, да, изгледаме многу богати, но од друга страна, огромен дел од нашето богатство е складирано во имоти, а најголемиот дел од тоа богатство е нашиот дом, односно богатство што не можеме да го искористиме и потрошиме.“
Освен тоа, според пресметките на авторите на истражувањето, минатата година вредноста на становите на Бугарите порасна за 100 милијарди лева, но тоа не се одрази врз квалитетот на живот на домаќинствата.
Исто така, 2024 година беше рекордна по број на трансакции со имоти, надминувајќи го претходниот рекорд од 2008 година. Од останатите 300 милијарди лева од богатството на Бугарите, половината потекнува од сопствен бизнис.
„Бугарите работат напорно и создаваат, а голем дел од нивното финансиско богатство е вложено во сопствени бизниси.“
Другиот дел од богатството на Бугарите е претежно во депозити.
