„Варненско лето“ 2025 најавува програма со театар од светска класа

Во јуни, Варна ќе биде домаќин на еден од најголемите театарски настани во Бугарија – Меѓународниот театарски фестивал „Варненско лето“, кој во својата 33-та година носи светски признати имиња, антички трагедии, модерни интерпретации и силни балкански соработки, јавува БГНЕС.

Фестивалот, кој започнува со продажба на билети од денес, ќе ги прикаже претставите на неколку варненски сцени: Државниот куклен театар, Фестивалниот и конгресен центар, Градската уметничка галерија „Борис Георгиев“ и Археолошкиот музеј.

Посебен акцент ќе биде ставен на античката трагедија, со претставите „Медеја“ на Народниот театар „Иван Вазов“ и „Едип“ на Националниот театар „Марин Сореску“ од Крајова. Двете дела се режирани од светски познатиот британски режисер Деклан Донелан и сценографот Ник Ормерод. Фестивалот повторно ќе претстави програма со висока уметничка вредност и разновидност – од современи интерпретации на антички трагедии до документарен театар.

Една од најспектакуларните претстави ќе биде „Орачот и смртта“ на Јоханес фон Тепл, во режија на романскиот маестро Силвиу Пуркарете, еден од најзначајните источноевропски режисери на последните децении. Оваа продукција на Националниот театар „Василе Александри“ од Јаш е добитник на сите важни театарски награди во Романија, вклучувајќи ја и наградата за најдобра претстава за 2021 година.

Фестивалот ќе ја прикаже и модерната драма, со новиот пристап кон „Трамвај „Желание“ на Тенеси Вилијамс во режија на Антон Угринов, како и визуелно впечатливата адаптација на „Малиот принц“ од Веселка Кунчева. „И двете претстави се продукција на Младешкиот театар, кој ја бележи 80-годишнината“, се наведува во програмскиот текст.

Бугарската програма ги вклучува најдобрите претстави од сезоната, со актери како Албена Павлова (носител на „Икар“ за главна женска улога), Радина Крџилова, Владимир Карамазов, Малин Крстев, Лилија Маравиља, Леонид Јовчев и Пенко Господинов.

Меѓу претставите се „Мајка Кураж“, „Хамлет“, „Јавен непријател“ и „Соврени непознати“.

Од меѓународната селекција, покрај Донелан и Пуркарете, ќе гостува и грчкиот режисер Продромос Циникорис, чии претстави се прикажуваат на најпрестижните европски сцени. Тој ќе ја претстави документарната претстава „96%“, која ги следи трагите на депортираните Евреи од Солун во 1943 година.

Фестивалот ќе ја истакне и соработката помеѓу бугарските и балканските театри, вклучувајќи ја претставата „Без крв“ на Диана Добрева (копродукција на Пловдивскиот драмски театар и Драмскиот театар од Велес, Северна Македонија), како и „Столб од сол“ на Јавор Грдев од Кралскиот театар „Зетски дом“ во Цетиње, Црна Гора.

Музичката програма ќе биде обележана со концертот на квинтетот „Астор Пијацола“, легендите на аргентинското nuevo tango, добитници на две Latin Grammy награди.