Светскиот ден за борба против ракот на дојка беше одбележан во Софија со иницијативата „Самопрегледај се“
На платото пред Националниот дворец на културата во Софија денеска беше откриена уметничка инсталација посветена на Светскиот ден за борба против ракот на дојка – симбол на женственоста, храброста и внатрешната сила на жената. Настанот е дел од националната кампања „Самопрегледај се“, организирана од Бугарското друштво за сликовна дијагностика на дојката, со поддршка на Министерството за здравство, Општина Софија, УМБАЛ „Царица Јоанна – ИСУЛ“ и Националниот дворец на културата, јавува БГНЕС.
„Светскиот ден за борба со ракот на дојка е ден кога си потсетуваме колку е тенка границата помеѓу здравјето и болеста, но и колку сила има во свесната грижа за себе. Инсталацијата која ја откриваме не е само естетски чин – таа е симбол на женственоста, храброста и на внатрешната светлина што не згаснува дури ни во најтешките моменти,“ изјави заменик-министерката за здравство Добромира Карева на свеченоста пред НДК.
Карева истакна дека кампањата „Самопрегледај се“ е многу повеќе од медицинска иницијатива – таа е општествена, семејна и лична кауза. „Ракот на дојка е излечлив кога се открие навреме. Тоа е порака што треба да стигне до секоја жена, без разлика на возраста, местото на живеење или секојдневните обврски. Денес, кога го одбележуваме и Денот на бугарскиот лекар, се потсетуваме дека довербата меѓу пациентите и лекарите е темел на секое успешно лекување,“ додаде таа.
Претседателот на Бугарското друштво за сликовна дијагностика на дојката, д-р Јордан Спиридонов, истакна дека бројките се загрижувачки: во 2024 година со дијагноза рак на дојка се соочиле 4490 жени, а во периодот 2020–2024 бројот на случаи кај жени на возраст од 18 до 25 години е зголемен речиси двојно.
„Овие податоци нè мотивираат нашата информативно-образовна кампања ‘Самопрегледај се! Раната дијагноза може да ти го спаси животот’ да ја претвориме во постојана мисија,“ рече д-р Спиридонов. Тој ги повика жените редовно и секоја година да посетуваат специјалист по сликовна дијагностика, како и секој месец да се самопрегледуваат.
„Ние сме вооружени со сите современи дијагностички методи за откривање на болеста во рана фаза. Треба да ја научиме бугарската жена да биде одговорна кон своето здравје – да ги следи промените во телото и да се консултира со својот лекар навреме. Така ќе можеме да лекуваме повеќе, порано и со помалку страв,“ додаде тој.
Заменик-претседателката на Советот на Општина Софија, Вања Тагарева, ја искористи приликата да им се заблагодари на сите бугарски лекари:
„Ова е денот кога им благодариме на сите кои секојдневно се борат за здравјето на луѓето. Благодарност до организаторите и апел – со здравје и сила, заедно да правиме добро,“ рече Тагарева.
