Тагарев до македонските студенти: Нашата добра соработка во одбраната помага во развојот на двете земји

„Добрата соработка на полето на одбраната меѓу Република Бугарија и Република Северна Македонија придонесува за развој на економските и социјалните односи меѓу двете земји.“ Со овие зборови министерот за одбрана Тодор Тагарев им се обрати на студентите од Р. на Северна Македонија и нивните бугарски колеги, кои вчера беа во посета на Министерството за одбрана на негова покана.

„На полето на одбраната и воените работи имаме многу можности и мора да ги искористиме на најдобар начин за да ја изградиме нашата заедничка иднина заедно“, нагласи тој.

Интеракцијата меѓу Република Бугарија и Република Северна Македонија во рамките на НАТО беше главна тема во обраќањето на министерот Тагарев пред студентите од двете земји. Тој им ги презентираше главните моменти од неговите активности откако ја презеде функцијата во летото 2023 година. Посебно внимание беше посветено на проектите за модернизација на бугарската армија и зголемувањето на одбранбените ресурси како одговор на зголемените ризици и закани кои произлегуваат од војната на Русија во Украина .

Двете земји набавуваат ист тип на борбени возила за копнените сили – „Страјкер“ и тоа создава многу добри услови за идна соработка, нагласи министерот. Според него, амбицијата на Бугарија е да изгради регионален центар за поправка и одржување на борбените возила од типот „Страјкер“.

Тој ја нагласи изградбата и активностите на мултинационалната борбена група на НАТО во Бугарија, во која членуваат војници од Република Северна Македонија.

„Денеска не можеме самостојно да ја гарантираме нашата одбрана, затоа работиме заедно со нашите сојузници“, нагласи министерот Тагарев.

Тој потсети дека воен персонал од двете земји учествуваат во заеднички вежби и подготовки, како и во составот на КФОР на Косово, што е од директен интерес за регионалната безбедност. Подготвени сме да го задржиме нашето учество во двете операции во Косово и во Босна и Херцеговина“, нагласи министерот Тагарев.

„Имаме многу добра соработка во военото образование, бидејќи офицери од Армијата на Република Северна Македонија редовно се обучуваат на Воената академија „Г. С.Раковски“. Интерес има и за другите наши повисоки воени училишта. Има перспектива за обука на македонски студенти од областа на воената медицина. Научници и експерти од различни организации заедно работат на заеднички сајбер проекти од областа на безбедноста, истакна и министерот за одбрана. Тој ја истакна и соработката меѓу двете земји во рамките на Процесот на состанокот на министрите за одбрана на Југоисточна Европа (SEDM).

„Немаме никакви противречности на полето на одбраната и вооружените сили. Соработуваме многу тесно на сите нивоа на ниво на Министерството за одбрана и вооружените сили на двете земји, што придонесува за подобра заедничка иднина“, нагласи министерот Тагарев.

По средбата со министерот за одбрана, експерти од Дирекцијата „Одбранбена политика и планирање“ пред студентите ги презентираа приоритетите во одбранбената политика на Министерството за одбрана во контекст на членството во НАТО. Посебно внимание беше посветено на аспектите на билатералната соработка и соработката во рамките на НАТО меѓу Бугарија и Република Северна Македонија, како и нивниот придонес за безбедноста на Алијансата.

Младите покажаа интерес за актуелните ризици и закани по безбедноста во регионот и светот и можните одговори на НАТО и неговите земји членки; предизвиците во односите меѓу двете земји, изгледите за заедничка обука итн.

По официјалните средби, тие имаа можност да ја разгледаат зградата на Министерството за одбрана и да се запознаат со неговата историја.

Студентите од Република Северна Македонија престојуваат во Софија на иницијатива на Софискиот безбедносен форум и со поддршка на Одделот за јавна дипломатија на НАТО. Тие заедно со бугарските студенти учествуваа на младинска конференција на тема: „Одговорот на НАТО на безбедносните предизвици во непредвидливо меѓународно опкружување“, што се одржа претходно во Централниот воен клуб во Софија во текот на вчерашниот ден.