Трамп и Путин разговараа во Алјаска: „Имаме многу добри шанси за договор“

Американскиот претседател Доналд Трамп изрази задоволство од „широките области на согласување“ со рускиот лидер Владимир Путин, но не откри детали за тоа како оваа изненадувачки пријателска средба ќе влијае врз војната во Украина, јавува БГНЕС.

На воената база во Алјаска, Трамп му приреди црвен килим на Путин, кој за првпат стапи на западна територија откако нареди инвазија во Украина. Американскиот лидер дури најави дека размислува за посета на Москва, а двајцата повторно се претставија како партнери.

Двајцата лидери одбија да одговараат на новинарски прашања, а Трамп накратко изјави дека средбата била „исклучително продуктивна“ и дека е постигнат напредок по многу прашања. „Имаме многу добри шанси да стигнеме до конечен договор“, рече тој, додавајќи дека сепак останува едно „најважно“ нерешено прашање.

Путин, пак, средбата ја оцени како „конструктивна“ и одржана „во атмосфера на заемна почит“. Тој изрази надеж дека постигнатото разбирање ќе го отвори патот кон мир во Украина, но предупреди на можни обиди за саботирање на процесот преку „провокации или закулисни интриги“.

Рускиот претседател нагласи дека Москва е „искрено заинтересирана“ да стави крај на конфликтот, но инсистира да се земат предвид „легитимните безбедносни грижи“ на Русија. „Треба да се воспостави праведен баланс на безбедноста во Европа и во светот“, истакна тој.

На крајот од средбата, Путин го покани Трамп да биде негов гостин во Москва, на што американскиот лидер одговори дека можеби ќе се случи и покрај можните тешкотии.

Средбата во Алјаска, која траеше околу три часа, дојде во силен контраст со острите критики на Трамп кон украинскиот претседател Володимир Зеленски во февруари. Трамп најави дека наскоро ќе разговара со Зеленски и со лидерите на НАТО за исходот од преговорите со Путин.