Трамп и Путин разговарале за нуклеарно разоружување во Алјаска

Американскиот претседател Доналд Трамп разговарал за нуклеарно разоружување со својот руски колега Владимир Путин за време на преговорите во Алјаска, јавува БГНЕС.

„Мислам дека разоружувањето е многу, многу важно,“ изјави Трамп.

„Но Русија е подготвена да го направи тоа, а мислам дека и Кина ќе биде подготвена. Не можеме да дозволиме ширење на нуклеарно оружје. Мора да ги запреме нуклеарните оружја,“ додаде тој, без да открие детали од разговорот.

Според извештај на Федерацијата на американските научници (FAS), заклучно со март 2024 година, Русија располага со вкупно 5.580 нуклеарни боеви глави, од кои околу 1.200 чекаат да бидат демонтирани – повеќе од која било друга земја во светот.

Рускиот арсенал вклучува тактички оружја за употреба на бојното поле и стратешки ракети способни да ја погодат територијата на САД, пренесува „Киев Индипендент“.

Москва повеќепати упатуваше нуклеарни закани кон Украина и Западот од почетокот на инвазијата во февруари 2022 година. Иако тие закани досега не се реализираа, стравувањата околу руските воени амбиции надвор од Украина остануваат присутни.

До денес, преговорите за контрола врз нуклеарното оружје меѓу Москва и Вашингтон не бележат напредок.