Трамп: Нема да воведам царини за земјите што не се согласуваат со моите планови за Гренланд

Претседателот на САД, Доналд Трамп, изјави дека нема да воведе царини за земјите што не се согласуваат со неговите планови за контрола врз Гренланд. Изјавата следува по средбата меѓу Трамп и генералниот секретар на НАТО, Марк Руте, на која, според него, била утврдена рамката на „идниот договор во врска со Гренланд“, јавува БГНЕС.

„Врз основа на една многу продуктивна средба што ја одржав со генералниот секретар на НАТО, Марк Руте, ја утврдивме рамката на идниот договор во врска со Гренланд и, всушност, со целиот Арктички регион. Оваа одлука, доколку биде финализирана, ќе биде исклучително поволна за Соединетите Американски Држави и за сите земји членки на НАТО. Врз основа на ова разбирање, нема да ги воведам царините што требаше да стапат во сила на 1 февруари. Во моментов се водат дополнителни разговори во врска со иницијативата „Златна купола“, во оној дел што се однесува на Гренланд“, напиша Трамп на својата социјална мрежа Truth Social.

Американскиот претседател додаде дека „дополнителни информации ќе бидат соопштени со напредувањето на дискусиите. Потпретседателот Џеј Ди Ванс, државниот секретар Марко Рубио, специјалниот пратеник Стив Виткоф, како и други лица по потреба, ќе бидат задолжени за преговорите — и директно ќе ми поднесуваат извештаи“.