Трамп повторно се закани со сила за преземање контрола врз Гренланд

Претседателот на САД, Доналд Трамп, повторно најави можност за употреба на сила со цел САД да преземат контрола врз Гренланд, игнорирајќи го суверенитетот на Данска врз автономниот арктички остров, јавува БГНЕС.

„Ќе направиме нешто со Гренланд, без разлика дали им се допаѓа или не“, изјави Трамп за време на средба во Белата куќа со претставници на нафтени компании.

Тој додаде дека претпочита договор, но не ја исклучи и силата:
„Би сакал да склучиме договор – по лесниот начин. Но ако не успее, ќе го направиме по тешкиот начин.“

Според Трамп, контролата врз островот е од клучно значење за националната безбедност на САД поради зголеменото воено присуство на Русија и Кина во Арктикот.
„Нема да дозволиме Русија или Кина да го окупираат Гренланд. Тоа ќе се случи ако ние не дејствуваме“, нагласи тој.

Данска остро реагираше на ваквите изјави. Премиерката Мете Фредериксен предупреди дека евентуална инвазија врз Гренланд би значела крај на поствоениот систем на безбедност и на НАТО-сојузништвото.

Трамп, пак, ги минимизираше данските грижи:
„Фактот што пред 500 години таму се закотвила една бродска посада не значи дека тие ја поседуваат таа земја“, изјави американскиот претседател.

Следната недела се очекува американскиот државен секретар Марко Рубио да се сретне со данскиот министер за надворешни работи и со претставници на Гренланд, во обид да се намалат тензиите околу спорот.