Трамп предупредува: Иран е во сериозни неволји, можни се силни американски удари

Претседателот на САД, Доналд Трамп, изјави дека Иран, кој се соочува со масовни протести, се наоѓа во „сериозни неволји“, повторно најавувајќи можност за воени удари доколку режимот употреби сила врз демонстрантите, јавува БГНЕС.

„Иран има големи проблеми. Изгледа дека луѓето преземаат контрола врз одредени градови — нешто што пред неколку недели никој не го сметаше за можно“, рече Трамп.

На прашањето каква порака им упатува на иранските лидери, тој одговори:
„Подобро да не почнуваат да пукат, затоа што и ние ќе почнеме да пукаме.“

Американскиот претседател додаде дека, доколку властите „почнат да убиваат луѓе, како што правеле во минатото“, САД ќе интервенираат.

„Тоа не значи копнени трупи, но значи дека ќе ги удриме многу, многу силно таму каде што најмногу ќе ги заболи“, нагласи Трамп.

Во меѓувреме, според податоци на правозащитна организација цитирана од АФП, повеќе од 50 демонстранти се убиени за време на протестите во Иран, што траат веќе речиси две недели, предизвикани од зголемувањето на цените во земјата.

„Најмалку 51 демонстрант, меѓу кои и девет деца под 18-годишна возраст, се убиени, а стотици други се повредени во првите тринаесет дена од новиот бран протести во Иран“, соопшти невладината организација со седиште во Норвешка „Ирански права на човекот“, зголемувајќи ја претходната бројка од 45, објавена еден ден претходно.

Во контекст на ескалацијата, синот на починатиот ирански шах Мохамед Реза Пахлави, Реза Пахлави, го повика американскиот претседател Доналд Трамп итно да интервенира, додека протестите во Исламската Република продолжуваат.

„Господине претседателе, ова е итен и непосреден повик за вашето внимание, поддршка и дејствување“, напиша Пахлави на социјалните мрежи.

„Ве молам, бидете подготвен да интервенирате за да му помогнете на народот на Иран“, додаде тој, цитиран од АФП.

Пахлави, кој живее во областа на Вашингтон, не прецизираше каква интервенција бара, но укажа на блокирањето на интернетот и на заканата од употреба на сила против демонстрантите.

„Ги повикав луѓето да излезат на улиците за да се борат за својата слобода и со бројноста да ги надминат безбедносните сили. Синоќа тие го направија токму тоа“, напиша тој.

Тој исто така посочи дека реториката на Трамп имала одвраќачки ефект врз властите:
„Вашата закана кон овој криминален режим ги држеше бандитите на режимот на дистанца. Но времето е од суштинско значење. Луѓето повторно ќе излезат на улиците за еден час. Ве молам за помош“, додаде Пахлави.