Турската амбасадорка во Бугарија: Ни бевте соседи, сега сте наши крвни браќа

Турската амбасадорка во Бугарија Ајлин Сикизѓок изрази благодарност до бугарските пожарникари, спасувачи, волонтери и лекари кои први реагираа на местото на разорните земјотреси кои ги погодија Турција и Сирија во почетокот на февруари.

„Благородни синови и ќерки на Република Бугарија! На 6 февруари Турција ја доживеа најмрачната ноќ во својата историја пред неодоливата сила на природата. 11 провинции ја видоа моќта на апокалипсата. Две ноќи по ред земјата се тресеше во две територии со вкупната површина на Бугарија. Уништувањето беше толку големо што сфативме дека не можеме сами, па побаравме помош однадвор.

Почитуван г-дин Претседател, вие бевте први што одговоривте на овој повик. А вие, драги пријатели, за неколку часа без двоумење отидовте во зоната на катастрофата“, се обрати турскaта амбасадорка кон претседателот Румен Радев, бугарските пожарникари и доброволци на церемонијата „Пожарникар на годината“, одржана во Централниот воен клуб во Софија.

Турската држава ќе ја надомести штетата, но нема начин како да се вратат изгубените човечки животи, додаде таа. И нагласи: „Вие, драги пријатели, бевте светлина во мрачната ноќ, спасувајќи десетици луѓе, синови и ќерки. Досега бевте наши соседи, сега сте наши крвни браќа“.

Шефот на државата Румен Радев пак рече: „Животот нуди голем избор – да останете во вашата комфорна зона или да дојдете на помош и да се впуштите во непознатото. На 6 февруари кога оваа катастрофа ја снајде Турција, токму храброста и самооткажувањето ги спасија животите на многу луѓе. Тоа даде храброст, надеж и самодоверба. Кога разговаравме со амбасадорот во раните утрински часови беше донесена одлука на највисоко државно ниво да се пружи помош. Тогаш, признавам, бев многу загрижен – дали ќе можеме логистички да се справиме, дали можеме да создадеме организација, дали можеме да стигнеме на време, дали може да се формираат тимови, како ќе продолжиме логистички, каква ќе биде координацијата меѓу соодветните институции, да се обезбеди сѐ што е потребно, да се пренесе товарот на бордот на „Спартаните“. Не поминаа ни 5 часа, ние бевме првата земја од ЕУ што слета таму со свои тимови. Ден потоа бев на Советот на ЕУ каде со голема почит се зборуваше за Бугарија“, изјави претседателот Румен Радев.

Радев упати и препорака до Владата – да се одвојат средства за дополнително финансирање за нашата противпожарна служба и за волонтерските организации.