Ученичка од Математичката гимназија во Пловдив го доби најголемото признание за својот научен труд во САД
Димана Праматрова ученичка од Математичката гимназија „Акад. Кирил Попов“ во Пловдив е меѓу петте најуспешни учесници на годинашното издание на Research Science Institute (RSI) во Масачусетскиот технолошки институт (MIT) во Бостон, САД, соопштија од гимназијата.
Таа го освои признанието за својот научен проект по математика, кој речиси шест недели го развивала во соработка со американски математичари. Ова е највисокото одликување на програмата, а Димана е третата математичарка од Бугарија, која го добила ова признание. Пред неа наградата ја освоиле само Димитар Чак’ров и Радостин Чолаков – исто така ученици од Пловдивската математичка гимназија.
Младата математичарка го импресионирала академското жири и публиката со својата смиреност, самодоверба и чувство за хумор, одговарајќи на прашања од професори, доктори и научници од светска класа. Програмата завршува со конференција на која прво се избираат 10 најдобри презентации, а потоа и „Top 5“ на годината.
RSI е најпрестижната меѓународна летна истражувачка школа за ученици со исклучителни способности во природно-математичките науки. Програмата обединува околу 100 средношколци од пет континенти.
Од 2001 година, Бугарија испраќа по двајца ученици во RSI, избрани по покана и интервју. Оваа година тоа беа математичарката Димана Праматрова од МГ „Акад. Кирил Попов“, Пловдив, и астрофизичарот Атанас Митрев од ЕГ „Христо Ботев“ во Крџали. Тие беа селектирани од жири составено од експерти од Институтот за математика и информатика при БАН.
