Ученички летен камп на Витоша ги поврзува децата од Софија и Босилеград

Проектот „Ученички летен камп Софија: заедница, култура и активен начин на живот“ е одобрен за финансирање во рамките на Програмата „Европа 2026“ на Општина Софија. Проектот го реализира здружението „Тема за луѓето“ од Софија, во партнерство со здружението „ГЛАС“ од Босилеград, во периодот од 27 до 31 јули годинава, јавува Радио Бугарија.

Целта на проектот е да ги зајакне врските меѓу децата од Софија и припадниците на бугарската заедница во Босилеград преку образовна, културна и спортска размена.

Во кампот учествуваат 30 деца на возраст од 10 до 15 години, од кои 15 се од Софија, а 15 од Босилеград. Во текот на петте дена учесниците ќе бидат сместени во планинарскиот дом „Балканити“ во Витоша.

Програмата предвидува посета на Центарот за уметност, култура и образование – филијала Лозенец, како и средба со претставници на Младинскиот центар Софија. Планирана е и посета на Зоолошката градина во Софија, туристички планинарски прошетки, активности за ориентација во планина, спортски содржини и часови по карате.

Учесниците ќе ги посетат и Националната библиотека „Св. св. Кирил и Методиј“ и Националниот природонаучен музеј. Во програмата се вклучени и литературна прошетка низ центарот на Софија, тимски игри, вечерни активности и културни иницијативи насочени кон создавање пријателства и поттикнување на меѓукултурната размена.

За време на кампот се предвидени планинарски тури до домовите Камен дел, Кумата и Копитото, како и до Бојанскиот Водопад, соопшти ГЛАС-ПРЕС.