Украински министер: Градовите на источното крило на НАТО би можеле да завршат како Авдиивка и Бахмут

Градовите на источното крило на НАТО би можеле да завршат како Авдиивка и Бахмут, рече министерот за надворешни работи на Украина.

„Ако рускиот претседател Владимир Путин победи во Украина и започне инвазија на балтичките земји, кои се членки на НАТО, храбро ќе го браните својот народ од непријател кој ве надминува во однос на искуството и способностите“, изјави Дмитро Кулеба за литванската новинска агенција ЕЛТА.

„На крајот, мислам дека НАТО ќе победи“, рече Кулеба. „Но, погледнете го Бахмут, погледнете ја Авдиивка – вака ќе изгледаат балтичките земји по интензивните борбени операции“, рече тој.

Источноукраинските градови Бахмут и Авдиивка сега се под руска контрола. Бахмут беше окупиран во мај 2023 година, а украинските сили се повлекоа од Авдиивка во средината на февруари оваа година. И двата града беа уништени од интензивни борби.

„Вака ќе изгледаат вашите градови. Нема да има поубав Вилнус“, додаде тој, мислејќи на главниот град на Литванија.

Неколку земји на НАТО се лоцирани на Балтичкото Море, вклучувајќи ги Латвија, Естонија и Литванија, а последната се граничи со руската ексклава Калининград. На Балтичкото Море се наоѓа и Шведска, а на крајот на минатата недела стана најновата членка на НАТО.

НАТО и обезбеди на Украина воена помош вредна десетици милијарди долари за повеќе од две години војна. Но, алијансата и нејзините поединечни земји-членки јасно ставаат до знаење дека НАТО не води директна војна со Русија.

Според член 5 од договорот за алијансата, нападот врз една членка на НАТО се смета за напад врз сите. Украина не е членка на алијансата.