УНИЦЕФ и бугарските институции ја зајакнуваат поддршката за најранливите деца и семејства

УНИЦЕФ во Бугарија продолжува со заедничките напори за подобра иднина за секое дете во земјата, соопшти организацијата на својата фејсбук-страница.

Претставникот на УНИЦЕФ во Бугарија, Мио Немото, се сретна со министерката за труд и социјална политика на Бугарија, Наталија Ефремова и заменик-министерката Надја Клисурска, со кои разговараше за клучните приоритети и можностите за продлабочување на долгогодишното партнерство.

Меѓу главните теми на средбата беа намалувањето на детската сиромаштија и поттикнувањето на социјалната вклученост, развојот на социјалните услуги, превенцијата на насилството врз децата и поддршката за менталното здравје.

Посебен акцент беше ставен на спроведувањето на Европската гаранција за децата и на потребата од подобра координација меѓу институциите, за најранливите деца и семејства да добиваат навремена и ефикасна поддршка.

УНИЦЕФ останува посветен на поддршката на националните напори за создавање поинклузивна средина што нуди поддршка и во која секое дете има можност да расте, да се развива и да го оствари својот потенцијал, се наведува во објавата.