Варна повторно станува престолнина на бугарскиот филм

Од денеска до 23 септември 2025 година, Варна ќе биде домаќин на 43-то издание на Фестивалот на бугарскиот игран филм „Златна роза“. Главната фестивалска сцена ќе биде Фестивалниот и конгресен центар, каде што публиката ќе може да ужива во богатата програма со најновите остварувања на бугарската кинематографија.

Во конкуренција ќе бидат прикажани 17 долгометражни и 24 краткометражни филмови, додека во паралелната, неконкурсна програма ќе се најдат 13 наслови. Посебен акцент е ставен и на пет класични проекции кои претставуваат омаж на бугарското филмско наследство.

Фестивалот ќе биде отворен со лентата „Љубоф“ на режисерот Ивајло Христов. Специјална проекција ќе му биде посветена на големиот актер Руси Чанев по повод неговиот 80-годишен јубилеј, преку филм составен од избрани сцени од неговите најзначајни улоги.

Бугарската публика ќе има ексклузивна можност прва, веднаш по премиерата во Венеција, да го види новиот филм на Стефан Командарев – „Made in EU“.

Меѓу најочекуваните настани е прикажувањето на „Гунди – легенда за љубовта“, филмот со најмногу гледачи во изминатата година. Исто така, ќе биде претставена и копродукцијата „Безсрамните“ на режисерот Константин Божанов, која во 2024 година беше наградена во Кан.

Со богата програма и ексклузивни премиери, „Златна роза“ и годинава ветува да биде вистински празник за љубителите на филмот.