Велемајсторите Веселин Топалов и Гари Каспаров ќе играат еден против друг во рамките на специјалниот настан „Меч на легендите“ во САД

Поранешните светски шампиони во шах велемајсторите Бугаринот Веселин Топалов и Русинот Гари Каспаров на 11 септември повторно ќе играат еден против друг во Сент Луис, Мисури, во рамки на специјалниот настан „Clutch Chess: The Legends“, јавува БГНЕС.

Двајцата велемајстори ќе одиграат 12 партии во Chess960, познат и како Фишеров шах, по четири партии дневно. Две партии ќе се играат со темпо од 25 минути плус 10 секунди по потег, а две ќе бидат блиц со 5 минути плус 3 секунди по потег.

Последната класична партија на Каспаров пред повлекувањето од професионалниот шах во март 2005 година беше токму против Топалов на турнирот во Линарес. Бугаринот победи, иако Каспаров го освои турнирот по дополнителен критериум.

Топалов и Каспаров повторно се сретнаа во Сент Луис во септември 2018 година, кога бугарскиот велемајстор победи со 14,5:11,5.

„Секогаш е чест и задоволство за Веско да игра со Каспаров. Самото име „Меч на легендите“ покажува колкава почит ужива тој во целиот свет и до ден-денес. Тоа е голем престиж и за Бугарија. Се надевам на добра претстава во која ќе уживаат сите љубители на шахот ширум светот“, изјави менаџерот на Топалов, Силвио Данаилов.