(Видео)Доц. д-р Светослав Живков: Стамболов го поставил државниот и национален суверенитет над се

Денес се навршуваат 130 години од убиството на големиот бугарски државник Стефан Стамболов, кој бил посечен со сабја во центарот на Софија на 6 јули 1895 година.

„Стефан Стамболов е еден од градителите на новата бугарска држава. Тој е симбол на преминот од бугарската Преродба кон новата слободна Бугарија“, изјави во интервју за БГНЕС историчарот доц. д-р Светослав Живков, професор на Историскиот факултет при Софискиот универзитет „Св. Климент Охридски“.

Доц. Живков го опиша Стамболов не само како политичар, туку и како поет, револуционер и несомнен државник. „Бурните времиња го извадија Стамболов на преден план“, потсети историчарот, објаснувајќи дека тоа особено се случува по русофилскиот преврат во 1886 година и симнувањето од власт на кнез Александар I Батенберг.

Стамболов застанува на чело на контрапревратот со цел да го врати Батенберг на тронот. По овие настани е избран за еден од тројцата регенти, кои треба да изберат нов бугарски кнез. По долгите дискусии и спорови, регентите се одлучуваат за Фердинанд Сакс-Кобургготски. Со доаѓањето на Фердинанд, Стамболов е назначен за премиер и на таа функција спроведува бројни реформи, стабилизирајќи ја земјата во внатрешно-политички и надворешно-политички план.

„Стамболов ги поставува темелите на многу насоки во бугарската политика, стопанство и култура. Тој ги задава правците на бугарската дипломатија барем до навечерието на Балканските војни. Бугарската држава треба да биде клучен фактор околу македонското прашање. Тој е меѓу првите кои согледуваат дека главни конкуренти на бугарштината во Македонија се грчката, а подоцна и српската пропаганда“, истакна доц. Живков.

Тој ја подвлече улогата на Стамболов за економскиот напредок на Бугарија. „Стамболов е првиот што почнува да води протекционистичка политика за поттикнување на индустријата. Тоа е сосема насочена политика за модернизација на земјата. Направена е модернизација и во казненото право, како и во многу други области“, појасни историчарот.

Доц. Живков потсети дека железничките линии во крајот на 19 век ја имале улогата на денешните автопати. „Благодарение на Стамболов и неговите наследници, Бугарија во пресрет на Првата светска војна има најдобра железничка мрежа на Балканот и не заостанува многу зад западноевропските држави“, додаде тој.

Како главни нарачатели на убиството на Стамболов се посочуваат луѓе блиски до Коста Паница, поврзани со македонското прашање. Коста Паница, бугарски офицер, сметал дека треба да го собори премиерот поради лошите односи со Русија и неговата политика за Македонија, поради што во 1890 година бил осуден на смрт и егзекутиран.

„Предавниците на Татковината не заслужуваат милост!“ – се зборови на Стефан Стамболов.

„Гледаме дека тоа е еден од бугарските политичари што го ставаат државниот и националниот суверенитет над сè и, за жал, ја плаќаат таа цена со својот живот“, заклучи доц. Светослав Живков.