(Видео) Големиот шампион Карлос Насар: Ми нудеа 2 милиони долари на година, јас сум Бугарин, нема да слушам друга химна за никакви пари

Светскиот и олимписки шампион во кревање тегови Карлос Насар откри дека му биле понудени околу два милиони долари годишно за да ја смени спортската припадност, но категорично одбил: „ Јас сум Бугарин. Нема да слушам друга химна за никакви пари.“, јавува БГНЕС.

Во интервју за NOVA тој зборуваше за тешкото детство, сложениот однос со татко му и големата улога на мајка му: „Нејзината добрина е слепа – малкумина ја имаат.“ Насар призна дека му требале три години да му прости на татко му, со кого долго време имал тежок однос.

Спортистот откри и дел од својот ментален пристап на подиумот: „Кога излегувам да кревам, го гледам детето во мене во публиката. Тоа ме тера да ги надминам границите.“

Централно место во разговорот имаше покојниот тренер Илијан Илиев: „Кога бев дете, ми велеше дека ќе бидам светски шампион. Неговата смрт е ужасна болка. Јас бев последниот што зборуваше со него.“

Насар зборуваше и за чудно брзото закрепнување по повредата — докторите предвидувале девет месеци без одење, а тој застанал на нозе по два.

Тежина во неговите зборови носеше критиката кон Бугарската федерација за кревање тегови: „Наместо мир добивам проблеми. Во договорите имаше илјадници казни. Од Стефан Ботев зависи дали ќе останам во Бугарија.“

Во личниот дел Насар ја спомена врската со одбојкарката Александра Костадинова: „Сфатив дека таа е жената кога почна да прави жртви.“

На крајот, тој порача дека амбициите за следната Олимпијада се уште поголеми: „Сакам да правам нешта што никој не ги направил.“ На прашањето дали силните мажи плачат, искрено одговори: „Се случувало.“