(Видео) Неколку сантиметри го делеле од смртта, човек преминува пруга пред воз

Пешак бил на само неколку сантиметри од удар од воз кој се движел со 112 километри на час додека ги преминувал шините без воопшто да погледне дали е безбедно да се помине, пренесува „Дејли Мејл“.

Видео снимка снимена од камерите на возот покажува човек како безгрижно преминува преку премин во Ранкорн, Чешир, Англија.

Возот, кој се движел на линијата Лондон Еустон-Глазгов, бил принуден да застане, па за среќа не удрил во пешакот.

Според „Network Rail“, максималната брзина за возовите на овој дел од пругата е 200 километри на час.

Преминот вклучува црвено предупредувачко светло кога не е безбедно да се помине, што човекот од видеото го игнорирал.

Луси Џордан, шефица за безбедност на „Network Rail“ за северозападниот дел, рече дека инцидентот можел „да доведе до трагедија“.

„Кога ќе видам ваква снимка, срцето секогаш ми застанува“, додаде таа.

„Разлика од само неколку секунди можеше да доведе до трагедија за овој човек и не можам да ја минимизирам опасноста во која се наоѓаше“, рече таа.

„Без разлика колку добро мислите дека познавате премин, сите корисници мора да ја почитуваат поставената сигнализација и доколку има предупредувачки светла, секогаш да застануваат кога ќе станат црвено, едноставно не вреди да се ризикува“, додава таа.

Дејв Вајтхаус, директор за безбедност на Западниот брег на Аванти, рече дека снимката е „остар потсетник“ да се биде „свесен за околината во близина на железницата“.

„Ова видео служи како остар потсетник да бидете свесни за вашата околина во близина на железницата, без разлика дали е на рамен премин или на станица“, истакна тој.

„Иако човекот избегна сериозна повреда или дури и смрт, ова покажува дека е потребен само дел од секундата за да се донесе погрешна одлука и за да заврши со трагедија.