(Видео) Новогодишно обраќање на претседателот на Република Бугарија Румен Радев

Ви го пренесуваме интегрално новогодишното обраќање на претседателот на Република Бугарија Румен Радев.

Почитувани сонародници,

Минути не делат крајот на една година полна со кризи и предизвици. Година која ја става на тест не само економската и социјалната стабилност, туку и способноста на нашите политичари да постигнат договор и да бидат рамо до рамо со граѓаните на нашиот заеднички пат напред.

Близо до нас, избувна една разорна војна за Европа , која продолжува да се разгорува и да станува пожестока. Енергетската криза и рекордната инфлација го погодија секој бугарски дом. И оваа година не нѐ подминаа елементарните непогоди и уште едни предвремени избори, а надежта за политичка стабилност се одложува за следната година. Но, токму во моментите на искушенија, кога беа во прашање човечкиот живот и нашата совест, нашето општество покажа емпатија, духовна сила, зрелост и единство за да ни ја врати вербата дека Бугарија ќе опстане. Институциите и граѓаните се здружија за да ги засолнат оние што бараат спас од војната во Украина, да ги изгаснат летните пожари и да им пружат помош на настраданите од поплавите во Карловско, да го најдат изгубениот Александар, да ја поддржат каузата за здравјето на бугарските деца.

Затоа, во денешната свечена ноќ, да не заборавиме дека спасот не е на дното на чашата, а успехот не е к’смет во баницата. Иднината се нашите заеднички напори во одговорната позиција на секој еден од нас во секој животен и политички избор. Нема недостижни цели, таму каде што се вложува граѓанска енергија, не за спас на поединци, туку за издигнување на целата нација, каде секој може да се гордее дека е дел од заедничкиот успех.

Им благодарам на сите што се бореа за подобра Бугарија во изминатата година, бидејќи никој од надвор нема да се грижи за нашиот напредок, за нашето достоинство и место под сонцето, за иднината на нашата татковина и на децата на Бугарија. Ова е наша грижа, одговорност и морална должност. Силно се надевам дека во новата година приоритетите на бугарскиот парламент ќе се поклопат со оние на граѓаните и дека политичките партии ќе ја преземат својата одговорност за долгорочниот одржлив развој на Бугарија. До формирањето на редовна влада, службената влада ќе продолжи да ја исполнува својата должност, да ја контролира енергетската криза и инфлацијата, да ја гарантира безбедноста на Бугарите, за модернизацијата и европската интеграција на нашата земја.

Почитувани сонародници, нè делат само неколку секунди до Новата 2023 година. Да си посакаме таа да донесе мир. Да ја пречекаме со верба во себе и надеж за иднината. Да ја надминеме апатијата и поделеноста, бидејќи само обединети, со силата и талентот на целата нација, можеме да ја изградиме таа Бугарија каде што ќе останат нашите деца и на која да се гордееме.

Подигнувајќи ги чашите, да им се заблагодариме на сите роднини и пријатели за нивната љубов и поддршка, да им оддадеме почит на оние кои се на своето работно место и на нивниот пост во празничната ноќ. Да им посакаме успешна година и на нашите сонародници во сите краишта на светот.

Нека Новата година го премине прагот на нашите домови со здравје, љубов и бериќет.

Среќна Нова 2023 година!