(Видео) Одбележуваме 7 години од смртта на големата Љубка Рондова

На денешниот ден пред 7 години почина големата бугарска пејачка на песни од македонската фолклорна област Љубка Рондова.

Љубка Василева Рондова е родена на 24 август 1936 г, во костурското село Шестево (Шестоево) во Беломорска Македонија. Нејзиниот дедо Димитар Илиев бил учесник во Илинденското востание. За време на Граѓанската војна во Грција, Рондова е дел од групата на т.нар. Деца бегалци. Живеела во Полска и Чешка. Дипломирала славјанска филологија на Карловиот универзитет во Прага. Од 1960 г. заедно со своето семејство таа живеела во Бугарија, каде што работела како туристички водич, уредник во Комитетот за култура во делот за рекламирање.

Во Софија станува дел од најстариот ансамбл за народни песни и танци „Гоце Делчев“. Долги години таа е солист и лице на ансамблот.

Првите записи на изворни македонски песни ги прави во Бугарското национално радио во 1980 г., а потоа следат Бугарската телевизија и Радио Благоевград. Рондова покажува пред пошироката јавност голем број песни од зборникот на браќата Миладиновци, песни собирани од Кузман Шапкарев и други бугарски преродбеници од Македонија. Нејзиниот репертоар вклучува и песни кои ги запишала од своите мајка и баба. Автор е и на голем број новокомпонирани песни.

Во 2000 г. Рондова го издава својот прв самостоен албум наречен „Смилјана“. Во него се вклучени 22 од нејзините најпознати песни, избрани од нејзиното богато музичко наследство. Во 2012 г. по повод 100-тата годишнина од Балканските војни, заедно со ансамблот „Гоце Делчев“ го создава проектот „Песни од Балканската војна“, реализиран со помошта на БНР. Во него се вклучени 7 речиси непознати песни поврзани со војната од 1912 г.

Љубка Рондова била жири во голем број фолклорни фестивали во Бугарија и во странство. Во 2002 г. е наградена со орден „Стара планина“, заради нејзиниот придонес кон развојот на бугарската култура. Носител е и на ордените „Кирил и Методиј“ II степен и златен медал „Петко Војвода“.

Во 2015 г. добива признание за животно дело и за нејзиниот целосен придонес кон развојот на бугарскиот фолклор. До својата кончина во 2016 г. таа работи во ансамблот „Гоце Делчев“.

Љубка Рондова умира на 15 март 2016 г. во Софија по долго боледување.