(Видео) Предмети против Мерко во Обивнителство со години тапкаат во место – го пријавувале граѓани, адвокати, Финансиска полиција

Обвинителството сподели дека работи на шест предмети, по кривични пријави поднесени против струшкиот градоначалник Рамиз Мерко. Тие дадоа информација само за случаите каде нема јавнообвинителска одлука. Најголем дел се дека тој сторил злоупотреба на службена положба и овластувања и се водат во струшкото Обвинителство. Пријава против Мерко имала и Финансиската полиција. Има и предмети отворени пред осум години, без никаква разрешница од обвинителите.

„КО бр. 107/23 кој е заведен по кривична пријава поднесена од повеќе Здруженија на граѓани, за кривично дело – Злоупотреба на службената положба и овластување од член 353 од КЗ. Пријавата е поднесена на 26.04.2023 година, постапува ОЈО Струга и преема дејствија за проверка на наводите. КО бр. 117/23 заведен во ОЈО Струга против наведеното и уште две други лица за кривични дела по член 353 и член 353-в од КЗ, а по кој има испитани лица и редовно се постапува. КО бр. 121/23 примен во ОЈО Струга на 19.05.2023 година и по кој се проучува пријавата и предистражната постапка е на почеток“, велат од Обвинителството.

Кривична пријава во 2015 година има поднесено и Финансиска полиција. Дури во 2020 година е издадена наредба за вештачење, кое и по три години не е готово.

„Обвинителот што постапува во предметот издал Наредба за вештачење до Бирото за судски вештачења, по доставените наоди во три наврати е побарано дополнување на вештачењето. Предметниот обвинител се уште го чека постапувањето по Наредбата за дополнување издадена во февруари 2020 година“, додаде Обвинителството.

Против Мерко се води случај и во Обвинителството за гонење организиран криминал и корупција. Овој е отворен во 2022 година, а се однесува на ангажмани за адвокатски услуги.

„Предметот е во предистрага и се постапува по истиот“, велат од Обвинителството.

Мерко се осомничен и за измама на повеќе лица, преку експропријација на земјиште во Струга. Овој предмет е во предистрага веќе четири години.

„По слични наводи постапувало и ОЈО Струга и ОЈОГОКК, по што двата предмети се споени, обезбеден е судскиот предмет и дел од списите кои се наведуваат во пријавата. Се наоѓа во фаза на предистражна постапка“, посочуваат од Обвинителството.

„Макфакс“ веќе објави дел од досието на Мерко, за постапки кои се воделе против него и нивниот исход. Најголем дел се затворени од обвинителите кои ги воделе.
Видеото погледнете го ТУКА