(Видео) Проф. Павлов: Ги повикувам на дијалог двата синода во Софија и во Скопје, БПЦ треба да заземе поактивна позиција во однос на црквата во РС Македонија

///

Македонската православна црква би требало да биде автономна во рамките на Константинополската патријаршија или да речеме да биде автокефална, каков што е нашиот сон, на луѓето во Македонија и на луѓето во Бугарија. Ова го изјави бугарскиот историчар, проф. д-р Пламен Павлов во емисијата „Hyde Park“ на порталот Трибуна.

„Не можам да го сфатам решението на СПЦ. Со истото, најверојатно се бара активирање на просрпските елементи во Македонија и во самата црква, какви што несомнено постојат. Не мислам дека тоа решение е перспективно“, изјави проф. Павлов во однос на одлуката на СПЦ да даде широка автономија МПЦ-ОА или Охридската црква според соопштението на Вселенската патријаршија.

Павлов додава дека широката автономија ја враќа црквата во РС Македонија во состојба, што е непожелна за општеството во РС Македонија и е во противречност со историските особености.

„Оваа одлука е обид за тестирање на расположението, од страна на Српската православна црква, но во случајот поинтересно е да ја видиме реакцијата на Македонската црква, на другите цркви и посебно на Бугарската православна црква“, вели Павлов.

Професор Пламен Павлов ја повика Бугарската православна црква да заземе поактивна позиција и изрази чудење зошто доцни официјалниот став на Светиот синод по ова прашање.

„Ги повикувам на дијалог и двете цркви- и софискиот синод и скопскиот или охридскиот синод. Мислам дека бугарската црква треба повторно да влезе во една активна позиција и да стане ако не де јуре, барем де факто во Црква-мајка, нешто што беше посакувано од многу луѓе во Македонија, вклучително и од членови на Светиот синод на МПЦ“, вели Павлов додавајќи дека според него молкот од страна на БПЦ трае претерано долго.



„Би требало да има официјална реакција и истата да биде во позитивна насока, со визионерски поглед, бидејќи на крајот од денот, треба да мислиме за минатото и за иднината, генерално за единството на нашиот општ православен народ, да се изразам дипломатски “, вели Павлов.

Павлов е дециден дека Русија и Руската православна црква работат против Бугарија и РС Македонија.

„Позицијата на Москва, повторно е непријателска за Бугарија, независно дали тоа е кажано директно или не. Непријателска е и кон Македонија, нашите браќа во Северна Македонија би требало да го разберат. Таа не е во корист на црквата, на народот и на луѓето во Северна Македонија. Тоа во пракса е повторно припојување кон Белград“, дециден е Павлов.

Претходна статија

Генчовска: Нашиот став за РСМ нема да се промени- Османи многу зборува, не сме на фудбалски натпревар

Следна статија

Бугарскиот премиер Кирил Петков ја прими американската помошник-државна секретарка Карен Донфрид

Најново од Вести