(Видео) Трилатерална средба меѓу премиерите на Бугарија – Романија – Грција

Премиерите на Бугарија, Грција и Романија – Николај Денков, Кирјакос Мицотакис и Јон-Марчел Чолаку го осудија нападот на палестинската група „Хамас“ врз Израел. Тројцата одржаа трилатерална средба во резиденцијата „Евксиноград“ кај Варна, со главен акцент на транспортното, енергетското и дигиталното поврзување на регионот, најави премиерот Николај Денков.

„Европа повеќе не може да си дозволи да биде исклучена, да нема патишта што ги поврзуваат соседните земји, да нема енергетско поврзување и со тоа да биде зависна од надворешни фактори“, истакна премиерот академик Николај Денков.

Главен фокус на средбата беше регионалното поврзување и поконкретно проектот за коридор од Солун преку Кавала, Александрополис, Бургас и Варна до Констанца со можност за продолжување до Молдавија. Идејата е да се изгради модерна транспортна, комуникациска и енергетска инфраструктура долж трасата, која ќе ги активира економските и политичките врски меѓу вклучените земји.

Средбата беше иницирана од Николај Денков за време на неговата посета на Атина во август. Тогаш бугарската страна изјави дека идниот коридор ќе функционира уште поефикасно кога сите земји долж трасата ќе станат членки на Шенген зоната и ќе исчезнат границите меѓу нив.