Вишиот федерален судија Дејвид Кембел се сретна со бугарски судии, обвинители и претставници на граѓанското општество

Амбасадата на САД во Бугарија соопшти дека го пречекала вишиот федерален судија Дејвид Кембел од Окружниот суд на САД за сојузната држава Аризона, во рамки на серија средби и настани со бугарски судии, обвинители, претставници на граѓанското општество и млади лидери.

„За време на посетата, судијата Кембел им се придружи на повеќе од 100 судии, претставници на судската власт и правни експерти на Форумот за судска етика и интегритет. Тој го сподели американското искуство во областа на судската етика, комуникацијата на судовите и градењето јавна доверба во судскиот систем“, се вели на официјалната фејсбук-страница на Амбасадата на САД во Бугарија.

Судијата Кембел учествувал и на семинар посветен на спротивставувањето на организираниот криминал, измамите и перењето пари, со фокус на користењето и допуштеноста на сложени финансиски и дигитални докази во кривични постапки.

Во рамки на посетата, тој се сретнал и со претставници на граѓанското општество, со кои разговарал за судската реформа и транспарентноста. Исто така, разговарал со учесниците на Летната академија за претприемништво на Младинскиот совет при амбасадорот на САД за улогата на судиите и значењето на интегритетот и етичкото лидерство.

На крајот од посетата, судијата Кембел го посетил Благоевград, каде што се сретнал со локални судии и обвинители за да разменат добри практики и да разговараат за можности за натамошно зајакнување на соработката меѓу САД и Бугарија во областа на кривичната правда.