ВМРО-ДПМНЕ: РУСКОВСКА ДА ГО ПОВИКА ЗАЕВ ДА ДАДЕ ИСКАЗ

Обвинителката Вилма Русковска не го повикува Зоран Заев на распит за неговата инволвираност во рекетирањето, иако е посочен во досега собраните искази, велат од ВМРО-ДПМНЕ преку соопштение.

Опозицијата обвинува дека за обвинителката Вилма Русковска важат двојни стандарди.

„Исказ од сведок пред три месеци ѝ беше доволен за да го обвини Митко Чавков и други лица за измислено дело тероризам, а сега Русковска кога станува збор за Зоран Заев, кој треба да се најде на обвинителна клупа, молчи, ја развлекува истрагата и ништо не презема. Вилма Русковска наместо да ја развлекува истрагата и да ги брани политичарите од врвот на власта, треба да го повика Зоран Заев да даде исказ и да истражи зошто тој му кажал на Зоки Кичеец дека се пријавени и против нив се води истрага?“, велат од ВМРО-ДПМНЕ.

Опозицијата е децидна дека доколку Зоран Заев им помогнал на директните извршители во извршување на кривичното дело тој треба директно да одговара.

„Зоран Заев треба да одговори и како инстиуциите на системот повеќе од половина година не знаеле за милионскиот рекет што се случува или можеби знаеле но по нечиј налог молчеле? Доколку во најбрз можен рок нема разрешница на случајот ‘Рекет’, што ќе значи и откривање на политичките помагатели, сè ќе биде само една огромна фарса. Со Зоран Заев на власт невозможно е да се очекува ефикасна и вистинса разврска на случајот ‘Рекет’. Потребни се брзи предвремени парламентарни избори. Потребна е обнова на Македонија“, додава ВМРО-ДПМНЕ во соопштението.