|

ВМРО-ДПМНЕ: Власта упорно молчи за 4 милиони долари, а воведува нови даноци поради празната државна каса

Димитар Ковачевски додека воведува нови даноци поради празната државна каса, не одговара на јавноста каде се 4 милиони долари од поделбата на имотот на поранешна Југославија што и припаднаа на Македонија, реагираат од ВМРО-ДПМНЕ.

Македонија додека тоне во сиромаштија и се измислуваат нови даноци, Ковачевски, според оваа партија, не одговара зошто Љубомир Фрчкоски не ги враќа парите во државниот буџет.

„Власта три дена молчи и не одговара зошто Љубомир Фрчкоски не ги префрла 3 милиони и 400 илјади американски долари од сметката на Постојаната мисија на Македонија при ОН во државниот буџет? Досега 3,4 милиони веќе се префрлени на сметка на Мисијата на Љубомир Фрчкоски, а се очекуваат уште 600 илјади американски долари. Јавноста има право да знае зошто Димитар Ковачевски молчи за скандалот?“, прашуваат од опозициската партија.

Бараат Димитар Ковачевски да смогне сили, како што велат, и јавно нека им каже на граѓаните за што се планирани овие пари.

ВМРО-ДПМНЕ ги повикува истражните органи во државата веднаш да побараат објаснување зошто 4 милиони долари не се вратени во Буџетот на Македонија.

Слични Објави