Во Бугарија започна предистражната постапка за поплавата во Царево

Предистражна постапка за предизвикување смрт поради непрофесионално извршување на работни задачи покрена Окружното обвинителство во Бургас во врска со катастрофата во општина Царево, во која животот го загубија четири лица.

Истрагата ќе биде сеопфатна, објективна и целосна. Ова го изјави окружниот обвинител на Бургас, Георги Чинев. Предистражната постапка е по член 123 од Кривичниот законик на Република Бугарија.

„Ова е кривично дело во кое кривична одговорност сноси лице кое предизвикало смрт на друг или на други лица, поради незнаење или несовесно вршење на занимање или друга законски регулирана дејност, што претставува извор на зголемена опасност, т.н. смрт поради професионална несовесност“.

Пропишаната казна за вакво дело е затвор од 1 до 6 години.

Извршен е увид на мостот каде се пронајдени телата на судијката Марија Москова и нејзината ќерка. Користен е високотехнолошки дрон, што е без преседан во нашата досегашна работа, нагласи Чинев.

„Со негова помош, успеавме не само да навлеземе внатре и особено под објектот, туку и да снимиме слики со висока резолуција и квалитет и да снимиме растојанија што ни се потребни за идната техничка експертиза.

Се чека назначување на тројни или петкратни вештачења, чија подготовка ќе трае со месеци, објасни обвинителот Чинев. Сослушувањето на сведоците продолжува. Извршени се судско-медицински вештачења и обдукција на починатите.

Сегашниот фокус е на објектот на мостот, но истрагата може да се прошири и да ја вклучи состојбата на речните корита и доловите.

Во секој момент може да се промени правната квалификација според обемот, видот и содржината на собраните докази, истакна и окружниот обвинител од Бургас.