Во Европскиот парламент денеска ќе биде претставена книгата на бугарскиот историчар Спас Ташев за македонското прашање во периодот 1949-1956

Во Европскиот парламент во Брисел денеска, со почеток во 18 часот, ќе биде претставено англиското издание на новата книга на бугарскиот историчар проф. Спас Ташев, посветена на меѓународните аспекти на македонското прашање во периодот од 1949 до 1956 година. Претставувањето се организира на иницијатива на бугарскиот европратеник Ивајло В’лчев, јавува БНР.

Во своето истражување, Ташев прави паралели меѓу политиката кон Бугарите во Македонија во првите години од Студената војна и современата ситуација во Северна Македонија.

Во интервју за Радио Благоевград, историчарот зборуваше за архивските документи и сведоштва врз кои се темели неговото истражување, како и за причините да се посвети на историски период што, според него, останува недоволно познат во Бугарија и на меѓународно ниво.

„Нема ништо ново под сонцето. Ситуацијата што ја гледаме денес, практично започнала уште во тој период“, изјави проф. Ташев, посочувајќи сличности меѓу тогашната и сегашната политика на Скопје кон луѓето со бугарска национална свест.

Централно место во книгата зазема улогата на Федералниот сојуз на европските националности, организација основана со цел да ги заштитува правата на националните заедници во Европа.

Во 1954 година, Македонските патриотски организации станале колективен член на сојузот, а една година подоцна организацијата усвоила резолуција со која го признала постоењето на македонски Бугари и констатирала прекршување на нивните човекови права. Документот бил испратен до Обединетите нации, Советот на Европа и владите на водечките европски држави.

Според Ташев, меѓународниот став започнал да се менува само една година подоцна, под влијание на геополитичките интереси на Западот за време на Студената војна. Тој смета дека стратешкото значење на Југославија како тампон-зона меѓу советскиот и западниот блок придонело западните држави да избегнуваат критики кон политиката на Белград во однос на Бугарите во Македонија.

Книгата е објавена на бугарски, англиски и руски јазик.

По денешното претставување во Европскиот парламент, на 16 ноември, понеделник, во 17:30 часот, во библиотеката во Благоевград ќе се одржи и промоција на бугарското издание. На настанот проф. Ташев ќе ги сподели своите впечатоци од претставувањето на истражувањето пред европската публика во Брисел.