Во Париз ќе има плоштад со името на големиот бугарски уметник Кристо и неговата сопруга Жан-Клод

Во француската престолнина Париз ќе биде именуван плоштад по големиот бугарски уметник и творец Кристо и неговата сопруга Жан-Клод, пренесува БГНЕС.

Градоначалничката на Париз, Ан Идалго, заедно со Градскиот совет, едногласно изгласаа плоштадот „Пон Ньоф“ да биде преименуван во плоштад „Кристо и Жан-Клод“.

Двајцата уметници се запознале токму во Париз во 1958 година – градот во кој започнало нивното заедничко уметничко патување. Еден од нивните најпрепознатливи проекти е токму „Опакуваниот Пон Ньоф“. Плоштадот се наоѓа околу статуата на најомилениот француски крал, Анри IV, чијашто лоза продолжува и кај последните тројца бугарски цареви.

Изборот токму овој плоштад да го носи нивното име не е случаен. Тој е во непосредна близина на мостот што Кристо го опакувал, место каде што лично ги убедувал жителите на Париз во значењето на својата уметничка визија.

Кристо Јавашев почина на 31 мај 2020 година во Њујорк, а неговата сопруга Жан-Клод почина во 2009 година.