Во претседателската институција во Софија ќе биде претставен зборникот „Азбука. Јазик. Идентитет“

Во зградата на Претседателската институција во Софија, со почеток од 11:00 часот, потпретседателката Илијана Јотова официјално ќе го претстави зборникот „Азбука. Јазик. Идентитет“, јавува БГНЕС.

Изданието ги содржи трудовите од Вториот меѓународен форум за кирилицата, одржан во 2024 година по иницијатива на потпретседателката и со поддршка од Министерството за образование и наука.

Форумот, што се одржа во Софија и Пловдив, собра над 30 познати слависти од 11 држави, кои заедно со бугарски колеги дискутираа за значењето на словенското наследство, неговото зачувување и промовирање во современиот свет, како и за клучната улога на Бугарија во создавањето на третата христијанска цивилизација – словенската.

Официјалното претставување на зборникот, на кое ќе присуствуваат дел од авторите на научните трудови од Бугарија и амбасадори на земјите од кои доаѓаат странските учесници, ќе се одржи по повод Денот на народните просветители – 1 ноември.