Водечка италијанска платформа за патувања топло ја препорачува Софија во есен

Меката клима, богатата културна понуда и можностите за запознавање со локалните традиции се само дел од причините зошто есента е најдобро време за посета на Софија – пишува водечкиот италијански онлајн портал за патувања siviaggia.it, кој неодамна ѝ посвети обемна статија на бугарската престолнина, пренесува БНР.

Софија е еден од оние градови кои умеат да изненадат без многу помпа. Не е класична „разгледничка“ дестинација, а токму во тоа е нејзиниот шарм – спој на различни архитектонски стилови, улици преполни со историја и жива атмосфера што балансира меѓу духот на Централна Европа и ориенталните влијанија.

Според авторката Флавија Кантини, периодот од септември до ноември е моментот кога градот најубаво го открива своето лице: светлината е потопла и помека, парковите се бојат во златно, а пријатните температури (од 17 до 25°C во септември) повикуваат на прошетки низ улиците и плоштадите, паузи во ретро кафулиња и набљудување на животот што тече поспоро отколку во летните месеци.

Близината на планината Витоша – само неколку километри од центарот – нуди можност за кратки бегства во природа. До средината на октомври времето останува благо, а булеварите обрамчени со дрвја, скриените дворови и златните куполи на православните храмови нудат вистинско естетско уживање. Кон крајот на октомври воздухот станува посвеж, утрата често се обвиени во магла, а во ноември не се исклучени ниту првите снегови, што ѝ даваат на Софија интимна и романтична атмосфера.

Есенската програма во градот е богата со културни и гастрономски настани од меѓународен ранг. Особено во ноември, љубителите на храната можат да уживаат во саемите Салон на виното, Патот на млекото и Interfood & Drink, каде што се нудат дегустации, работилници и презентации на традиционални бугарски специјалитети – од баница и таратор до вина што ретко се среќаваат надвор од Бугарија.

Дополнителен мотив за италијанските патници да ја изберат Софија токму во есен е и новата директна авионска линија на позната нискобуџетна авиокомпанија од Торино. Од 28 октомври 2025 година, ќе има три лета неделно – во вторник, четврток и сабота – овозможувајќи полесен пристап до престолнината, која сè уште останува надвор од радарот на масовниот туризам, заклучува siviaggia.it.