Започна реконструкцијата на Дебарската градина во Софија

Градоначалничката на реонот Красно село во Софија Цвета Николаева, претседателот на Спаси Софија Борис Бонев и општинскиот советник Стефан Спасов денеска го означија почетокот на реконструкцијата на Дебарската градина во Софија, јавува Факти.бг.

Проектот е дел од предизборните ветувања на Николаева и од напорите за порамномерна распределба на инвестициите во квартовите. Предвидена е целосна обнова и трансформација на просторот во современ парк, со нова мрежа на патеки, интегрирање на Ерменската црква во просторот, ново детско игралиште, зона за фитнес на отворено и подобрување на зеленилото.

„Обновувањето на квартовите за нас не е ‘крпење’ на постојната состојба, туку целосен, добро планиран процес за создавање современа урбана средина. Дебарската градина ќе се претвори во место за одмор, спорт и средби на локалната заедница“, изјави Николаева, додавајќи дека ова е дел од континуираните напори за подобрување на инфраструктурата во Красно село.

Спасов нагласи: „Таквите простори не се само зелени површини – тие се место за живот. Кога ги обновуваме квалитетно и со мисла за луѓето, создаваме средина во која квартот станува помирен, поактивен и поповрзан.“

Бонев истакна дека ваквите проекти се клучни за развојот на градот: „Неодамна започнавме дискусија за обновување на булеварот Христо Ботев, водени од оваа филозофија – секое вложено евро во градот да гарантира квалитетна, модерна, зелена и безбедна средина за граѓаните.“

Дебарската градина во Софија е создадена од македонски Бугари од Дебар преселници во Софија. Изградена е во знак на почит кон загинатите во Охридско-дебарското востание од 1913 г, кренато против српската окупаторска власт во Вардарска Македонија.