Заврши 29-то издание на Банско џез фестивал – почнува подготовката за јубилејното 30-то издание
Дваесет и деветтото издание на Банско џез фестивалот заврши по десет фестивалски дена, во кои беа одржани 83 концерти на четири сцени со учество на музичари од повеќе од 20 држави. Организаторите веќе ја почнуваат подготовката за јубилејното 30. издание, закажано од 30 јули до 8 август 2027 година, јавува Пиринско.
Фестивалот, кој годинава се одржа од 31 јули до 9 август, понуди богата меѓународна и домашна програма, како и повеќе придружни и паралелни настани.
Проширениот фестивалски формат опфати дневни и вечерни концерти, џез-точки, уметнички настани и образовни иницијативи на различни локации во Банско.
Во програмата настапија познати имиња од светската џез-сцена, афирмирани бугарски изведувачи, меѓународни музички проекти и млади артисти кои претставуваат нови насоки во развојот на жанрот.
Посебен акцент и годинава беше ставен на младите музичари. Банско џез академијата, сцената за млади таленти, џез-точките и џем-сесиите им овозможија на претставниците на новата генерација активно присуство во фестивалската програма.
Во текот на фестивалот секојдневно се одржуваа прес-конференции со главните изведувачи, како и средби и разговори со музичари од меѓународната сцена.
Меѓународната димензија на фестивалот беше проширена и со официјални и неформални средби, организирани по иницијатива и покана на локалната власт, со претставници на дипломатски мисии, збратимени европски градови и партнери на Општина Банско.
На средбите се разговарало за размена на идеи и добри практики, како и за можни идни партнерства во областа на културата, туризмот, младинските иницијативи и европската соработка.
Со завршувањето на 29. издание почнува подготовката за јубилејниот фестивал во 2027 година. Триесеттото издание на Банско џез фестивалот ќе се одржи од 30 јули до 8 август 2027 година, продолжувајќи ја тридецениската фестивалска традиција и развојот на неговите програмски формати.
