Здравје, радост и добрини носи Баба Марта

На 1 март Бугарите се китат со мартинки во бела и црвена боја како симбол на здравје, радост и доаѓањето на пролетта. Потеклото на обичајот е многу старо и се поврзува со различни легенди, пишува БГНЕС.

Според одредени легенди, уште Тракијците врзувале мартеници за време на пролетните мистерии, а бело-црвената нишка го симболизирала бескрајот на животот. Друга легенда го поврзува обичајот со Аспаруховите Бугари, кои ги зачувале белата и црвената нишка како знак за здравје и среќа. Народните приказни за Баба Марта објаснуваат дека мартинките се носат за да биде таа благонаклонета и да донесе убаво време.

Во народните верувања 1 март го означува почетокот на пролетта и будењето на „лошотилукот“, па мартинката се сметала за заштита од болести и уроци. Се вади кога ќе се види првиот штрк и се остава на зелено дрво или под камен.

Обичајот не е присутен само во Бугарија, туку и во Романија, Молдавија, Албанија, Грција, Македонија и Србија, со различни локални варијанти.