Зголемен интересот за бугарскиот јазик во Косово: Добри вести и за научната размена на релација Приштина-Велико Трново

Во рамките на иницијативата „Денови на бугарскиот јазик, култура и наука во Косово 2026“, организирана од Амбасадата на Бугарија во Приштина по повод 24 Мај – Денот на бугарската азбука, просвета и култура, беа одржани два значајни настани кои уште еднаш ги истакнаа продлабочените културни и академски врски меѓу Бугарија и Косово, јавува Радио Бугарија.

За првпат пред публика во Косово беше претставен популарниот моноспектакл „Жива“ на талентираниот актер Димитар Живков. Настанот собра претставници на бугарската заедница во Косово, припадници на бугарскиот контингент во КФОР, Бугари кои работат во Приштина, како и бројни пријатели на Бугарија.

За време на свечената вечер, амбасадорот Христо Краевски го истакна значењето на бугарската азбука и култура, нагласувајќи дека „чудото на бугарските букви“ веќе го наоѓа своето место и во Косово преку неодамна отворениот Лекторат по бугарски јазик на Универзитетот во Приштина. Тој го нагласи значењето на оваа стратешка иницијатива, реализирана со активна поддршка од Амбасадата на Бугарија, Министерството за образование и наука на Република Бугарија и раководството на Универзитетот во Приштина.

Иницијативата продолжи и денес со еден многу возбудлив момент – средба со првите студенти кои избрале да учат бугарски јазик. Седумтемина млади учесници добија симболични подароци – образовни изданија посветени на Бугарија и маици „Бугарската азбука“, како знак на признание за нивниот интерес кон бугарскиот јазик и култура.

„За нас е особено радосно што интересот за бугарскиот јазик се претвора и во реални можности за студентите. Двајца од нив веќе заминаа по програмата „Еразмус“ во Великотрновскиот универзитет „Св. св. Кирил и Методиј“, а уште двајца ќе учествуваат на Летниот семинар по бугарски јазик и култура. Тоа е најдобар доказ дека културната и образовната размена меѓу Бугарија и Косово успешно се развива. Покрај тоа, колеги од Универзитетот во Приштина беа во ВТУ преку програмата „Еразмус“, а во моментов двајца докторанти и еден предавач од ВТУ се во Универзитетот во Приштина. Особено симболично е што сето ова се случува во мај – месецот на бугарската азбука, писменост и култура, кога најсилно го чувствуваме значењето на зборот и духовните врски меѓу луѓето. Сакам посебно да му се заблагодарам на раководството на Филолошкиот факултет и на колегите за поддршката и добрата соработка, како и на Амбасадата на Република Бугарија во Приштина за постојаната ангажираност и помош во развојот на лекторатот по бугарски јазик.“, изјави за Радио Бугарија лекторот по бугарски јазик во Приштина Раки Бело.

Одржаните настани покажаа дека културната и образовната соработка меѓу Бугарија и Косово продолжува успешно да се развива, создавајќи нови можности за младите луѓе и за културната размена меѓу двете држави.