Желјазков: Проектот за блоковите 7 и 8 на нуклеарната централа Козлодуј е од стратешко значење за Бугарија и Југоисточна Европа
Изградбата на 7-ми и 8-ми блокови на нуклеарната централа Козлодуј е клучен чекор кон гарантирање на енергетската безбедност на Бугарија. Проектот има стратешко значење и за нашата земја и за регионот на Југоисточна Европа. Ова го изјави бугарскиот премиер Росен Желјазков на средба со делегација од „Hyundai Engineering and Construction“, предводена од извршниот директор Хану Ли. Во разговорот во Владата на Република Бугарија учествуваа уште министерот за енергетика Жечо Станков и извршниот директор на АЕК Козлодуј – Нови капацитети Петјо Иванов, соопшти владината прес-служба, пренесува БГНЕС.
Проектот за нови нуклеарни капацитети на нуклеарната централа Козлодуј беше во фокусот на денешниот состанок на бугарската Влада, откако кон крајот на минатата година започна имплементацијата на инженерскиот договор меѓу АЕЦ Козлодуј и конзорциумот составен од бугарските ограноци на Westinghouse Energy Systems и Hyundai Engineering and Construction. Извршувањето на договорот ќе ги поддржи регулаторните чекори за спроведување на проектот, како и пресметката на идните инвестициски и оперативни трошоци.
Во текот на денешниот разговор, премиерот Росен Желјазков увери дека бугарската страна ќе направи се што е потребно за да се забрза процесот на имплементација, без тоа да биде на сметка на квалитетната изведба. Придаваме големо значење на безбедноста при изградбата, како и на безбедното функционирање на блоковите во иднина, истакна Желјазков. Премиерот беше дециден дека проектот мора да ги почитува сите национални и европски правила и стандарди.
