Желјазков во Брисел за РСМ: Бугарија нема да поставува никакви дополнителни услови и нема да го претвора процесот во билатерален

„На почетокот на Европскиот совет имав средба со претседателот Кошта – разговаравме детално за проширувањето на Западен Балкан, при што акцентот беше ставен на прашањето за проширување на Европската унија – Северна Македонија, базирано на принципот на сопствени заслуги. Нашата позиција е во целосна согласност со позицијата изразена во декларацијата на Народното собрание од мај оваа година, која дава доволно гаранции и на Република Северна Македонија дека Бугарија нема да поставува никакви дополнителни услови и нема да го претвора процесот во билатерален“, изјави за БНТ бугарскиот премиер Росен Желјазков во Брисел.

Според неговите зборови, овој процес ќе биде разгледуван од страна на Бугарија како земја членка на Европската унија и на Европскиот совет како однос меѓу Европскиот совет и Република Северна Македонија.

„Многу јасно во разговорот беше поставено прашањето дека исполнувањето на компромисот од 2022 година, кој предвидува измени во уставот на РСМ со внесување на бугарската заедница, е условот што е неопходен за да започне преговарачкиот процес“, додаде Росен Желјазков.