Бугарскиот адвокат Валентин Савов е избран за претседател на Надзорниот одбор на Меѓународната фискална асоцијација
Бугарскиот адвокат и експерт за меѓународно даночно право Валентин Савов е избран за претседател на Надзорниот одбор на Меѓународната фискална асоцијација – глобална организација што обединува водечки стручњаци од областа на меѓународното даночно право и даночната политика, соопштуваат од организацијата, пренесува БТА.
Изборот се одржа на 18 октомври во Мелбурн, Австралија, во рамките на 78. годишен конгрес на Меѓународната фискална асоцијација, кој собира даночни експерти, претставници на бизнисот, државните администрации, академската заедница и меѓународните организации од целиот свет.
За првпат од основањето на организацијата во 1938 година, Бугарин застанува на чело на еден од нејзините највисоки раководни органи. Како претседател на Надзорниот одбор, Валентин Савов ќе раководи со органот задолжен за надзор и советување на Извршниот одбор на Меѓународната фискална асоцијација, вклучително и за прашања поврзани со управувањето и стратешкиот развој на организацијата.
Валентин Савов е адвокат со богато меѓународно искуство, стекнато во Бугарија, Холандија и Јапонија. Има магистерска диплома по право од Софискиот универзитет „Св. Климент Охридски“ и магистерска диплома по меѓународно даночно право од Универзитетот во Лајден, Холандија. Неговата професионална дејност ги опфаќа меѓународното оданочување, даночните договори, трансферните цени и советувањето на меѓународни компании и инвеститори.
Неговиот избор за претседател на Надзорниот одбор на Меѓународната фискална асоцијација е значајно признание не само за неговата професионална стручност, туку и за местото на Бугарија во меѓународната правна и даночна заедница, се истакнува во соопштението.
Денес Меѓународната фискална асоцијација обединува над 13.000 членови од повеќе од 110 држави и има над 70 национални ограноци низ светот. Организацијата се етаблира како независна и неутрална платформа за научен и професионален дијалог во меѓународната даночна заедница.
