ЗНМ во Брисел ги пренесе барањата од новинарскиот протест

Безбедни новинари и сниматели, крај на неказнивноста на напаѓачите врз новинарите, крај на агресивниот пиар на Владата и на омаловажувачкиот однос на политичарите кон медиумските работници, итно формирање фонд за квалитетни медиумски продукти, беа дел од темите што претставниците на Здружението на новинарите на Македонија (ЗНМ) ги истакнаа за време на посетата на Европскиот парламент и Европската комисија во Брисел.

Денеска и утре, претставници на ЗНМ во Брисел имаа директни средби и разговори со пратеници од Европскиот парламент и вработени лица од Директоратот за проширување при Европската комисија на теми поврзани со правата на новинарите во Македонија и условите во кои работат медиумите.

Како важни прашања за евроинтеграцијата на државата беа посочени неколку конкретни работи, и тоа: прво, законскиот контекст и (не)имплементацијата на медиумските закони, второ, економскиот статус на медиумите и новинарите како предизвик во вршење на нивната работа, трето, прашања поврзани с боезбедноста на медиумските работници и, четврто, можноста да се формира фонд за новинарски продукти.

Претставниците на ЗНМ, Младен Чадиковски и Драган Секуловски, и пратеникот Илхан Ќучук, кој е известувач за Македонија во Европскиот парламент, се согласија дека се потребни итни чекори за подобрување на состојбите за што новинарската заедница, како што беше речено на состанокот, има поддршка од Европскиот парламент. Новодонесените закони, кои се важни за медиумските работници, како што се Законот за граѓанската одговорност од клевета и навреда и Законот за измена на Кривичниот закон, се позитивни чекори, но не смее да се дозволи да има уназадување во другите процеси важни за слободата на медиумите, беше истакнато на средбата.

Се одржа и средба со претставникот на Европската комисија, Виктор Тилев, при што се оцени дека пред земјата стојат многу предизвици од аспект на новинарските прашања во областа на сите теми што се наметнати.

Европските претставници се согласија некои од овие барања да ги адресираат и како дел од идните активности на Брисел со Скопје.

Посетата на ЗНМ беше во рамките на редовните активности на мрежата SafeJournalists, која застапува повеќе од 8.200 медиумски работници во Западен Балкан, во која, освен ЗНМ, членки се здруженијата на новинарите од Белград, Приштина, Сараево, Загреб и новинарскиот синдикат од Подгорица.