Зографскиот манастир во Света Гора го прослави есенскиот празник на свети Георги

По целоноќно бдение и света литургија, рано изутринава со литија и чудотворната икона на свети Георги, бугарскиот манастир „Свети Великомаченик Георги Зограф“ на Света Гора го одбележа есенскиот празник на свети Георги (по стар стил на 16 ноември), кога неговите мошти биле пренесени од местото на неговото мачење во Лида во Мала Азија (денешниот град Лод во Израел) во новоосветен христијански храм, јавува БНР.

Богослужбата беше предводена од Браницкиот епископ Јоан – прв викар на Софискиот митрополит и Бугарски патријарх Даниил, во сослужение со игуменот на Зографскиот манастир, архимандрит Гавриил.

Епископ Јоан го истакна значењето на молитвата за оние што престојуваат на Света Гора. „Да се нагодиме така што ќе влеземе во брановите на ова свето место. Тука овие бранови се нарекуваат молитва. Со молитва сме поклоници. Без молитва сме само туристи“, рече тој.

Во празникот учествуваа и многу поклоници од Бугарија, кои се вклучија во носењето на иконата на светиот великомаченик Георги.

„Св. великомаченик Георги Зограф“ е бугарски православен манастир кој се наоѓа во монашката република на полуостровот Атон. Тој е еден од најголемите манастири на Света Гора и се наоѓа на 9. место во хиерархијата на светогорските манастири.