МААЕ бара од Русија и Украина да ја заштитат нуклеарната централа во Запорожје

Директорот на Меѓународната агенција за атомска енергија (МААЕ), Рафаел Гроси, побара од Украина и Русија да ги прифатат петте принципи за заштита на нуклеарната централа Запорожје.

Гроси рече дека и по неколкумесечни напори, не можел да обезбеди договор меѓу двете страни за заштита на објектот и намалување на ризикот од катастрофална нуклеарна несреќа, која би можела да биде предизвикана од воени активности како што е гранатирањето.

Петте принципи на Гроси вклучуваат обврска да не се извршуваат напади на локацијата и од локацијата на нуклеарната централа, да не се користи просторот на нуклеарната централа за распоредување на тешко оружје како што се повеќе ракетни фрлачи и проектили, артилериски системи и муниција и тенкови, како и за стационирање на војници.

На брифинг во Советот за безбедност на ОН, Гроси побара станиците за снабдување со електрична енергија надвор од локацијата Запорожје да останат достапни и безбедни, како и сите други витални системи кои мора да бидат заштитени од напади или саботажа.