Сојузниот министер за храна и земјоделство на Германија ја посети Македонија првпат од осамостојувањето

Министерот за земјоделство, шумарство и водостопанство, Љупчо Николовски, имаше чест да му биде домаќин на сојузниот министер за земјоделство и храна на Сојузна Република Германија, Џем Оздемир. Ваква посета од федерален министер за земјоделство се случува првпат по повеќе децении од осамостојувањето на Северна Македонија и далеку пред тоа.

Претставници на германското Министерство за храна и земјоделство, предводени од сојузниот министер Оздемир, денеска се во еднодневна посета на нашата држава. Притоа ќе посетат фарма и мала семејна винарница. Ќе дегустираат домашна македонска храна и ќе се запознаат со млади земјоделци и жени земјоделки.

Во рамките на посетата се одржа билатерална средба помеѓу министрите на која се разговараше за резултатите од досегашната соработка и придобивките за македонското земјоделство од ваквата значајна поддршка што ја добиваме од германската влада. Двајцата министри разговараа и за идните планови за подобра реализација на европската зелена агенда, Берлинскиот процес и можностите за македонското земјоделство со членство на нашата држава во Европската Унија.

„Нашата соработка е на високо ниво, поддршката што ја добиваме од германската влада се однесува на многу значајни проекти, кои придонесуваат за поголем развој на земјоделското производство. Трговската размена на земјоделски прехранбени производи со Германија од 2020 година до сега бележи значителен пораст и има зголемен интерес за соработка помеѓу македонските и германските компании. Она што особено ме радува е што денеска министерот Оздемир ми потврди дека тие ќе нè поддржат во спроведувањето на реформите во шумарството и остварувањето на зелената агенда, која е во согласност со европската заедничка аграрна политика“, истакна министерот Николовски.

Сојузниот министер за храна и земјоделство, Џем Оздемир, во своето обраќање истакна дека иднината на Северна Македонија е во Европската Унија.